Na tutu situtu do na hudok on tu ho: Andorang umposo dope ho, ho do mangkohosi dirim, laho manopot lomo ni roham; alai dung matua ho, surdukkononmu ma tanganmu, jadi hohosan ni na leban ma ho jala togihononna ma ho tu na so hinalomohon ni roham.Alai marhite sian hatana ondeng dipalumba do ibana, manang songon dia parmatena laho pasangaphon Debata. Jadi dung didok songon i, ninna ma mandok ibana: Ihuthon ma Ahu!
Ditingki manaringoti kemajuan tehnologi tarlubobi ma di bidang informasi komunikasi, adong do natua-tua mandok: “tabo nai tingki sinuaeng on ate, aut sura nian boi niulakhon mulak poso.” Sada panghataion na patoranghon pardalanan ni ngolu ni jolma na holan sahali be do dilehon di hita “kesempatan” manang “peluang”. Ala ni i do mansai las do roha molo pola dapot ni hita “kesempakan kedua”, manang mangulahi mulak poso.
Hombar tu panindangion ni haporseaonta, sude hita nunga mandapot kesempatan kedua, ai ganup hita naung tardidi dibagasan goar ni Tuhan Jesus Kristus tu bagasan hamateanNa do hita tardidi, ala ni I nanung tartanom do hita jala di pahehe asa marngolu na imbaru hita nuaeng. (pt Rom 6:3-4). Panghilalaan na songon i ma na mian di si Petrus dung pajumpang ibana dohot Jesus naung hehe sian na mate. Nungga sanga mian ila ni roha di si Petrus ala disoadahon ibana Jesus. Halak na talu do ibana jala talu ibana dipangunjunan. Talu patuduhon hasetiaonna tu Jesus . Alai dung pajumpang dohot Jesus na hehe I diboto si Petyrus ma na so boi partaluan I pangambati tu holong ni roha ni Jesus. Dipasung Jesus ma muse roha ni si Petrus marhite na manangkasi holong ni rohana pola sampe tolu hali marhite sungkun-sungkun na sarupa: ”holong do roham di Ahu?”.
Marhite pangalaho na masa tu si Petrus I gabe boi dohononta paboa na godang na soboi be haulahan dipardalanan ni ngolu di portibion, ala nungga matua daging. Alai anggo Debata sai olo do ibana mangulahi holong ni rohaNa, gariada taeh didok “mulak rata do I ganup sogot” (Andung 3:23) asa tung dapotan hangoluan na porsea i.Ndang diambati angka hasalaan di tingki na salpu holong ni roha ni Debata tu hita. Dilupahon do angka dosa ni haposoonta, sai dipaimbaru do holong ni rohana asa sai tongtong hita marpanghirimon. Sahat tu na matua hita sai tongtong Debata paimbaruhon holongNa asa songon pidong raja wali, songon pandok ni par Psalm i: ”Ibana pamahap roham marhitehite denggan basa, asa mulak poso ho, songon * pidong raja wali.” (psam 103:5)
Diharingkothon Jesus do mangajari angka sisean i laho mangadopi angka tingki na naeng ro. Atik pe hea talu si Petrus alai ndada pola gabe pangambat hataluan na i tu angka tingki na naeng ro. Dilehon Debata dope “kesempatan kedua” tu ibana laho patuduhon parsitutuonna mangihuthon Jesus. Dipaboa Jesus do tu si Petrus paboa nunga ro tingkina naso boi be ibana manjua, manang pasidinghonhon diri. Nunga ro tingkina ibana songon halak na tuatua I ma: “ surdukkononmu ma tanganmu, jadi hohosan ni na leban ma ho jala togihononna ma ho tu na so hinalomohon ni roham.”. Nunga ro tingkina na ingkon rede ibana manaon manang aha pe na masa ala ni haporseaonna tu Jesus. Sitaonon na masa tu Jesus na boi do masa tu si Petrus, i ma di parsilanghon. Ndang dope pintor patar didok Jesus i tu ibana, alai mahiite pandohan “ihuthon ma ahu” na boi do i martudutudu tu partinaonan ni Jesus di silang i dohot haheheonna.
Tidak ada komentar:
Posting Komentar