PADAN NA IMBARU

Jeremia 31: 31-34

Pdt.Gunawan Panjaitan.M.Si

1. Sada fakta sejarah na ni adopan ni Bangso Israel maradophon Debata i ma: Dipillit Debata nasida gabe bangsona, dilehon Debata patikna jala dipaboa sangkap nirohana tu bangsoi asa mangoloi Debata. Alai sai na olo do bangso I tumundalhon patik ni Debata, ujungna hona uhuman manasida. Disolsoli nasida mamuse pardosan nasida, mulak ma muse asi ni roha ni Debata, dijangkon ma muse nasida gabe bangsona. Songon I ma sai mulakhulak pardalanan ni ngolu ni bangso i. Mangihuthon Jeremia pangalaho na sai olo mulakhulak manimbil sian dalam na tinotophon ingkon diadopi do I marhite na manurathon langsung patik ni Tuhanta I dibagasan rohani jolma I sandiri, jala on ma na dioari “Padan Naimbaru” na manguduti / paimbaruhon padan narobi naung pinungka ni Debata maradophon ompu nasida uju diboan nasida ruar sian tano Misir. Na marpadan do Debata tu bangsoNa marhite na mangalehon Patikna tu si Musa. Dipamasuk do I tu Poti na margoar “poti parpadanan”. Sai di dipaboanboan nasida do poti parpadanan on songon uluan di jolo dohot parningotan di asi ni roha ni Debata. Atik pe songon i sai na manimbil do nasida ujungna tarbuang. Ditingki habuangan di Babel dipaingot Jeremia do na patupaon ni Debata tu bangso i di sada tingki haimbaruon: na ro do angka ari sogot, ninna Jahowa, pungkaonku ma padan na imbaru tu pinompar ni si Israel dohot tu pinompar ni si Juda.

2. Padan Naimbaru on i ma Padan na mandok: Lehononku ma patikku tu bagasan ateatenasida jala surathononku do i tu bagasan rohanasida, asa ahu gabe Debatanasida, * jala nasida gabe bangsongku. Padan na imbaru mambahen perobahan tu hadirion ni ganup halak na porsea di Debata. Naummotikna adong dua Pandohan haimbaruon I:

Ganup Halak gabe Surat ni Debata. Lapatannda ganup halak I ma na patoranghon paboahon jala marisihon lomo ni roha ni Debata. Heado Apostel Paulus mandok: Hamu do suratnami, naung sinurathon tubagasan rohanami, na tinanda jala jinaha ni saluhut jolma. Ai tanda do hamu surat ni Kristus na hupature hami, sinurat so dohot tinta, marhite sian Tondi ni Debata na mangolu, i do; ndada tu panuratan batu, alai di panuratan daging, i ma ateate (2 Korint 2-3). Padan na Imbaru mambahen hita gabe “surat na mangolu” na boi jahaon ni sude Jolma jala asa diboto nasida Debata parholong roha maradophon sude halak. Songon Surat ni Debata hita ndada surat na sala alamat hita, surat na kabur, manang surat kaleng na so martuan, manang surat na mangaleai manang paroaroahon alai surat na disurat marhite Tondi ni Debata na mangolu i. Asa tondi I do na mampargogoihon hita asa gabe surat ni Barita na uli.

Ganup halak “mempunyai hubungan istimewa” (adong parsaoran na rosu) tu Debata: asa ahu gabe Debatanasida, * jala nasida gabe bangsongku. Lapatanna ndang pola be angka na porsea I jolo melalui perantara, manang perwakilan laho mangadop Debata, alai ganup halak naung gabe bangso ni Debata boi seara langsung marparsaoran tu Debata. Dihorhon on ma nian panghilalaan na manghasiholi parsaoran Dohot debata naung mambahen hita gabe bangsona.

3. Marhite Padan Naimbaru i tubu ma sada “kesadaran religius” lapatanna jolma gabe mananda Debata disude panggulmiton ni ngoluna. Ndang pola siajaran be jolma laho mananda angka pambahennan ni Debata di ngoluna. Ndang siajaran be jolma asa unang sai manomba debata na mate, debata na so tinanda, manang manomba debata ganaganaan. Ujungna ndang adong be jolma na mansoadahon pambahenan ni Debata jala ndang adong be na manghatindanghon gogo dohot pingkiran ni jolmai sandiri do na marhuaso di portibion. Alai marhite Padan Naimbaru nungga Patar Debata tu hita, nungga ro imbana patandahon dirina, nungga tinggal Ibana rampak dohot hita jala i ma na tadapot dibagasan hadirion ni Yesus Kristus. Domu tusi molo adong dope jolma na mandok ndang adong Debata, holan tangkang dohot jugul ni roha nama na pinataridahonna disi. Anggo Debata nungga tung mansai godang dalan dipangke laho pataridahon huasona dohot holongna marapothon jolma saluhutna.