PANJOUON NA SO TARJUA

Turpuk: Jeremia 1:4-10

Manghorhon parungkilon bolon do di si Jeremia gabe panurirang na pinillit ni Debata. Ala ni ragam ni angka sitaonon na niadopanna gabe pola sanga ibana mambuburaihon ari hututbuna: “Siburaan ma nian ari hatutubungku! Ari panubuhon ni dainang di ahu, unang nian hona pasupasu. Siburaan ma nian jolma na mamaritahon tu damang songon on: Nunga tubu di ho sada anak palas situtu rohana nian.” (Jer 20:14-15). Atik pe songon i parungkilonna ndada na gabe ditinggalhon ibana ulaon hapanurirangon i. Ai ndang tolap ibana laho mansoadahon ulaon i. “Jadi ningku ma: Ndang be taringotanku ibana, jala ndang be ahu marjamita marhitehite goarna, hape gabe songon api na marsigorgor di bagasan rohangku huhilala, tarhurung di bagasan holiholingku, siol mandate ahu mangotapotapi, hape ndang tarbahen.” (20:9). Adong dua hagogoon na maralo di hadirion ni si Jeremia: parjolo hagogoon ni Debata na mamaksa Ibana ingkon mangulahon parsuruonna . Napaduahon hagogoon pardagingon ( bersifat naluriah badaniah) ni dirina sandiri na naeng paluahon diri sian ragam ni angka parmaraan.

Hagogoon ni Debata naung mamaksa Ibana mangulahon ulaon i tarida do sian mula ni pamillitonna gabe panurirang. Dipillit Debata do Ibana sian keluarga ni malim na di Anatot ianakon ni parhalado ni Bagas joro ni Debata. Pamilliton na i dihatindangkon si Jeremia do nungga di patupa Debata andorang so dijadihon Debata do pe ibana di bortian jala tagan so tubu dope Ibana tu portibion nungga diparbadia jala dipillit Debata. Jeremia marhatopothon hadirion ni ibana tubu tu portibion ala na adong do ulaon dohot tujuan na tontu di aturhon Debata. Panindangion na songon on naeng do mian di ganup diri ni halak asa uanang adong panghilalan tubu ibana tu portibion ala ni “na so sengaja” alai naeng ganup marhatopothon adong do rencana ni Debata nanaeng siulahononna manang sijaloonna.

Pamilliton i torus do mandalani proses. Diboto si Jeremia na poso do na so “cakap” (capable) dope ibana mangula ulaon i ala “ndang huboto manghatai ai na bajar dope ahu”. Sada alasan na wajar jala masuk akal sian angka na poso molo dipasahat ulaon na marpardomuan tu ulaon haparladoon di harajaon ni Debata. Jala Debata pe tahaporseai maklum do dikeadaan ni Jeremia na poso. Alani i do adong proses dipamilliton i ma: marsiajar. Adong do opat bagian si parsiajaran ni Jeremia na poso:

Haunduhon ni roha (ketaatan / loyalty)

Dipangido Debata do parjolo sahali siguruhonon ni si jeremia ima unduk ni roha manang ketaatan tu na marsuru i. “Ai manang tudia pe ho husuru, ingkon tusi ho laho, jala manang aha hutonahon tu ho, ingkon i do hatahononmu.” Sikap on ingkon tarida di ngolu siganup ari ima haunduhon tu na mangalehon ulaon i.

Pos ni roha (percaya diri / confidence )

Ingkon guruhonon ni si Jeremia na poso pos ni roha , rasa percaya diri na mambahen ibana tau mangulahon ulaon i. Naeng botoonna ndada ulaon lomo ni rohana na nu ulahonna alai ulaon na marsuru Ibana do lala ni ndang porlu mabiar, Delehon Debata do pos ni roha: Unang ho mabiar maradophon nasida, ai sai ahu do donganmu, paluahon ho.

Porlu pelatihan / pendidikan na manubuhon keahlian (kompetence)

Dibahen Debata do hataNa marhite tanganna tu pamangan ni si Jeremia na poso asa “cakap” ibana mangulahon hapanurirangon i. Adong proses belajar, ndang pintor malo jala ala ni do porlu singkola manang angka lembaga parsamean asa haruaranka na kompeten tu ulaon i.

Porlu mangantusi uraian tugas (Job description)

Ditontuhon Debata do uraian tugas dohot alamat ni ulaon ni si Jeremia . Ulaonna maradophon : Bangso dohot harajaon (Bangsa dan pemerintah) I ma mangaranapi “ laho mangurati dohot maniaphon, mangago dohot mangaloha, paulihon dohot manuan.” (ay 10). Ulaon haparhaladoon ni si Jeremia na mansai borat na tong gabe ulaon ni angka na mangula di bagas joro ni Debata. Dituntut do kemampuan menganalisa, mangatur strategi dohot patupahon angka pendekatan asa dapot angka na paulihon dohor na manuan .

Pdt.Gunawan Panjaitan,M.Si.